qasd nameket awerd dawe pêm
cwab namekey gileyî dwîr
From the Book:
Dîwanî Mîne Caf
By:
Mine Jaff (1911-1965)
2 minutes
402 views
qasd nameket awerd dawe pêm
baz awerd we so zam kone û nwêm
mezmûnî namey ’emberîneket
me’nay ’îbaret gewherîneket
er bî dîdekem fermabêt we naz
xeylî firawan gile û î’tiraz
qîblekem gilet we naḧeq kerden
xeta gişt ce tos ta we řoy merden
çen sałan çen mang çen şewan û řo
’umirim çû we bad dił we meylî to
carê nawerdî řeḧmê to we dił
netirsay ce say ełḧed seray gił
xeta gişt ce to xeyanet ce to
řewîyey xwênmijî û cînayet ce to
çen car çun xwênî řam da we bextit
çen deẍalet dam we payey textit
çen cewr çen cefa ne to dîm we çem
çen watey bedkar çen taney hawdem
wêm kerd we pûl qełb nařeway şaran
zerdexeney bezim guroy bedkaran
netirsay ce řoy miḧakmey ḧeq
netirsay ce zułim kirdewey naḧeq
řayê neyawa sełamê ce to
ya we merḧemet peyamê ce to
na’îlac ce êş diłey ẍemgînim
ne bêqerarî erway şîrînim
ce serdîy kelam ce dił sextî to
ce bê mirwetî û ce bedbextî to
we wêney mecnûn řûm nya we çoł
wêm kerd we ’ewdał kełpûs dam we koł
geřyam pey yekê we nazarim bo
wêney ḧekîman dewakarim bo
awerdim we des î newnemame
î terłan tewaw qûmrî xerame
îsteyş azîz gyan mayey ḧeyatim
hêzî zînganî řûy ser bisatim
medom sogendit we cwanîy wêt
we bałay ’er ’er diłistanî wêt
we wêney caran we watey bedkar
kerîm we ser beḧis naw kołanî şar
meder firêwim memker we tane
mekerom we řaz naw qawexane
ya xud ger şîmey ẍedirit terk kerden
řewyey zordarît ce bîr wêt berden
çun min gyan fîdam toyş derûn keylî
wek min dił kebab toyş dił piř meylî
goş nadey we ḧerf watey bedkaran
namkey we sermeşq gişt herzekaran
şerit bo azîz gyan şertî we řasî
şertî ’aşiqan we dił îxlasî
we wêney mînePen name ta we toy kefen
tewqî ẍułamît bixem we gerden