mewlam zamî to
şîwen bo kerîm begî bawkim
From the Book:
Dîwanî Mîne Caf
By:
Mine Jaff (1911-1965)
3 minutes
588 views
mewlam zamî to ...
mewlam şerarey sextî zamî to
qesem bew kesey min cya kird ce to
bew tewr pêkyan diłey řenceřo
çe ḧekîmen gişt weneş cem bo
taweřoy meḧşer sařêş nimebo
mewlam bew kesey hemtaş nyen
bakiş ce kafey masîwaş nîyen
derdî duryeket hîç şifaş nîyen
zamanî hicranî to dewaş nîyen
her kes wêney min pey to bedḧał bo
mebo ta mirdin şêt û ’ewdał bo
mewlam bê nazî dîwan xaneket
kizî û kesasî naw dîwaneket
matî û diłtengî ehlî yaneket
karê pêm kerden bew qor’aneket
ta ce ser bisat satê jînim bo
mebo min daym nałe û şînim bo
mewlam min nałe û derdekey karîm
şîn û fîza’ û zebûnî û zarîm
waweylay wegurim îş ewgarîm
kizî û kesasî û ey gyan ewgarîm
wa le seraser ce mehcûrîy to
bêle gişt ce êş derdî dûrîy to
mewlam serdaran emîranî ’êł
mewlam ře’îsan komaranî xêł
seraser ẍembar řaşan byen wêł
mewaçan fełek lêłayît ba lêł
ew gewrey diłsoz mîllet ha ne ko
mewlam paşakan emîran caf
dîqet dan ’eşret wêşan bê xilaf
ẍeyr ce to nedîn mîrî saḧb laf
řutbey řyaset we yeqîn saf
----------Missing
siperden we to waçe dumay to
wekî layq bo ew text, ew şiko
mewlam min şertim perê wêm kerden
wêney ferz ferzim gerdan we gerden
karim dimay to ta řojî merden
şîn û zarî bo hûnî dił werden
ne cagey şadî û dił xoşîm her řo
bergim qełaxî û wîrim řořo bo
şerit bo ta meyo qabîz pey mergim
heta mewrazan kefen pey bergim
necagey seyran gułzar û mêrgim
çun aw carî bo hûnaw cergim
ta satê beqam ce serzemîn bo
mebo min pîşem şîn û girîn bo
ey řomen ey řo mîrî lengim řo
eyřo serdarî xusrew řengim řo
eyřo řostemî řojî cengim řo
eyřo şazadey saḧb dengim řo
eyřo sergewrey ’êl cafim řo
eyřo ře’îs saḧîb û lafim řo
eyřo pey wars ḧatemî sanî
eyřo pey ře’îs ’êlî muradî
eyřo wêney to kê we diłşadî
ce dway to bîka mecils arayî
lêl gewre û biçûk dił pak ce qîn bo
xendan wêney goł kelam şîrîn bo