to ezanî ey weten emřoke bo çî bê beşî
lawî kurdan
From the Book:
Dîwanî Diɫdar
By:
Dildar (1918-1948)
5 minutes
1685 views
to ezanî ey weten îmřoke bo çî bê beşî?
bo çî destî şew nîşanî to eda namey řeşî?
pêt biłêm esbabî gewrey zîllet û çareřeşî?
gencî kurdan her le dewrî mey eken ẍîretkeşî
wextê bade dête meclîs, nawî kurd dête zuban
sa were seyrî fikir ke û ax û daxî lawekan
dengî nałe wa gwêçkida ełêtin bê guman
lawî kurdan her le dewrî mey eken ẍîretkeşî
wa legeł dengî tifeng û agirî dewraneda
wa legeł nałey weten gerdê le em zîndaneda
dête gwêm dengê besoz, hawar eka lem aneda
lawî kurdan her le dewrî mey eken ẍîretkeşî
esleḧey her mîlletê sa dest û bazûy gencyetî
řojî şu’lebexşî ummêd fikir û karî gencyetî
merhemî zam û birînî kirdewe û hem řencyetî
lawî êmeş her ledewrî mey eken ẍîretkeşî
çunke mîllet bêt û leş bê lawe řoḧî em leşe
bêt û em řoḧe nemênê ew le jîna bê beşe
’eynî derde kurd ke kewte derdî karî daweşa
lawekanî her le dewrey mey eken ẍîretkeşî
mîlletê ger gencî sist bê, mirduwe, mîllet nîye
takû mabê, nêw derûnî bê cefa û ’îllet nîye
şadmanî textî jîn û tacekey ’îzet nîye
lawî kurdan her le dewrî mey eken ẍîretkeşî
mîlletê ger lawî çust bê, zînduwe û hîç namrê
hîç be zîllet dest û payan wa le bendî naxrê
sed hezar tîẍî zemane bêt û estoy nabřê
lawî êmeş her le dewrî mey eken ẍîretkeşî
’eybe ’eybe lawî kurdan! seyrî lawî ẍeyre ken
fikirî bê bakî beserçû, sa le kelle tefre ken
dewrî nûstintan beserçû, seyrî em naw dewre ken
’eybe çîtir, bes le dewrey mey meken ẍîretkeşî
seyrî naken lawî ẍeyre, giştî bazûy quwetin
giştî sûdbexşî wiłat û merkezî sed hîmmetin
bo becê hênanî karî cwan le řîgey mîḧnetin
’eybe çîtir, bes le dewrey mey meken ẍîretkeşî
lawî ẍeyre dêne ser xo, canfîdakarî eken
bo jyanî nîştimanyan giştî xwênkarî eken
ca lebo fewtanî dujmin řawî eẍyarî eken
’eybe! êweş her ledewrey mey meken ẍîretkeşî
seyrî naken çen betîne destî lawî ẍeyrewa
bêt û wextê qînî hełsê û kułemiştî lê bida
wa le tirsana elerzin gawî gerdûn û sema
lawî kurdan bes le dewrî mey meken ẍîretkeşî
wa şî’arî ’esrî bîstem hîmmete, hîmmet biken!
mîweyî darêkî hîmmet, xizmete. xizmet biken!
merhemî zam û birîntan qudrete. qudret biken!
êwe ta key her le dewrî mey eken ẍîretkeşî?
seyrî eḧwałî weten ken çon zebûn û mirduwe
seyrî karî dojminan ken çî be ḧałî kirduwe
seyrî řeşmałî zelalet asmanî girtuwe
êwe ta key her le dewrî mey eken ẍîretkeşî?
seyrî baẍatî weten ken! wişke kewtûne xezan
seyrî ẍunçey newşkofey çend bebê naz hełweran
şahîdî bêkarî êwen wa ke wa awîy biřan
’eybe ta key her le dewrî mey eken ẍîretkeşî?
’eybe ey law xawenî em şax û daxey kurdî to
xawenî te’rîxî xwênîn û dilêrî û gurdî to
’eybe bê karî! heta key seyrî nakey? mirdî to
’eybe çîtir bes le dewrî mey meken ẍîretkeşî
hełse ey law têt geyênim mîllîyet me’nay çîye
ta bizanî lawî ẍeyre mezheb û řêgay çîye
ya lebo amanc û jînî kirdewey hemtay çîye
hełse bibye bes le dewrey mey meken ẍîretkeşî
mîllyet ye’nî be nûkî řimbî dujmin bêye hoş
seyrî etrafit bikeyt û danîşî hêndê peroş
agirî hestî bezîllettan le diłda bête coş
hełsî inca nek le dewrî mey bikey ẍîretkeşî
mîllîyet ye’nî le ziřřey toq û zincîr řapeřî
tewqî yexsîrî le estoy xot û mîllet laberî
bê ye serxot û bizanî to le řêga laderî
hełsî inca bes le dewrî mey bikey ẍîretkeşî
hełse bêkarî heta key bê ḧiqûq û bendikiraw
hełse bêkarî heta key hey le jêr xak dařzaw
hełse bêkarî heta key me’rezî ehdafî daw
hełse! hełse! bes le dewrey mey meke ẍîretkeşî
herkesê piştî be gerdûn bestibê, piştî şika
herkesê çawî le destî ecnebî bû, kwêr kira
kamî lê der bû le řêgey serbexoyîda jya
hełse, hełse bes le dewrî mey meken ẍîretkeşî
mîlletê ger xwênî neřjê dest û pêy nakirêtewe
bê kîfaḧ guftar wesîqey jînî pê nadrêtewe
bade û mestî miqamî ḧuryet nagrêtewe
hełse, hełse bes le dewrî mey meke ẍîretkeşî