amadekirdinî řêwřesmî zemawend lelayen cehangîr şawe û hatnî meymûne xatûn
From the Book:
Suɫtan Îbrahîm û Noşaferîn
By:
Khana Qubadi (1704-1778)
4 minutes
317 views
ce demay yek mah şay bułend exter
kefit netedarek ’erûsî dułber
* «mesaf» yekser ře’yet îlat
xerc hefit sałe horgirt ne wiłat
bendyan ce bend temam řeha kerd
esîran bedest warêsan siperd
ce sa’et se’d yewm mubarek
perê şazade kefit netedarek
şêr diławer ferheng tełeb kerd
watiş ’ezîz û řefîq çułgerd
îmşew bedewan ta sifîde dem
bişo be mekan guł baẍçey îrem
xatûney perî bawer belay min
mełhem zaman darûy şefay min
to ce tenxiway min destiş bibûsî
waçe we bê to tełxen ’erûsî
qedem řencan ker şay şêr demaẍim
bê şewqen bê to şu’ley çiraẍim
sake êd şineft ferheng tund xêz
wêney tîr nemewc keman kerd gurêz
qurb sê sa’et bê zyad û kem
yawa be menził gułistan îrem
sucde berd berûy xatûney dułber
ḧałî kerd řazan şazadey serwer
wextê ke ejnî xatûney diłkêş
çenî çend perî nîşt we text wêş
horgirtin dêwan text zeřnîgar
xatûne ce puşt dêwan bî swar
yawa be xidmet şazadey serwer
selam kerd beřûy dułber sefder
şî netoy ḧerem şox nazenîn
bedîdar pak şay noş aferîn
horêza we pa şî we pêşwaziş
her dû dîdey wêş we payendaziş
nîştin bedłişad ta bewe’dey şam
şam awerdin, saqî û bade û cam
ta be sifîde meclîs nekar bî
deng noşay noş badey gułnar bî
ewşew xatûne şox lebate
nezer kerde bê webê meşate
tertîb da xałan bedir kemałş
hezar wêne kerd bedir cemałş
be perdaxt bałaş bew ała saza
hezar guł beberg řengařeng řaza
bey tewre kerdiş bałay newbehar
menmana ce řeng tawis ne gułzar
ebruwan xetat qetranîy peywest
sîwa kerd nedewr nergisan mest
dû dîdey sêweng xwab ałûy mexmûr
sya kerd be gerd tûtyay koy tûr
«dane endamş daney xezêne
řaza be tertîb sed hezar wêne»
* bes terkîw şoxî û şox xatir teř
benaz awerdiş beřûy text zeř
şem’ dił’efrûz meş’elan hezar
řewşen kerdişan ce seray gułzar
sê hezar perî çun tawis baẍ
girtin nerûy kef meş’el û çiraẍ
beřûy hewawe midran sef be sef
wêney meş’eldar çiray şew bekef
* şa be wezîran kerdiş îşare
ekabêr xêza ce her kenare
şazadey çînî be ḧerem berdin
daxił be xełwet nazenîn kerdin
yawa be pay text şay ḧorî leqa
cemîn menmana wêney qurs ma
horêza we pa şîrîn diłkêş
şazade berdiş behem zanûy wêş
peyapey bosa guł gonay řendiş
menoşa serbest ce ḧełqey qendiş
cewdima ferma ce badey gułnar
awerdin mutrêb saqî nerûy kar
meclîsî arast ew şew we bê ẍem
mer bezim xusrew ya cemşîd cem
meymûne xatûn, perî gişt yekser
beřûy hewawe seyrşan meker
ta be şebeq řo be şadmanî
meşẍûł ’eyş bîn be kameranî
seḧer horêzan be meqsûd dił
meram û metłeb temam bî ḧasił
şazadey çînî be xatir guşad
ḧesbulrezay wêş yawa be murad
bekameranî meyl be’eyş û noş
ce weswesey şeř dewran feramoş
be şewq û şadî bedemaẍ dił
dem bexendewe meşkawa çun guł
be arezûy wêş be xatirxiwahî
şî we baregay dîwan şahî
çenî cehangîr be fîrûzîy bext
her dû bedłişad nîştin we ban text
şa ferma şukirim bedanay dawer
şad bîm bedîdar ferzend dułber
hem şazade çîn bewr bê endêş
sikey nîknamî ji endiş perê wêş
* nam dilêrîş menşûr bî ne ’am
bî be nesîbiş serwî diłaram