pařanewey sułtan îbrahîm le dergay xway gewre
From the Book:
Suɫtan Îbrahîm û Noşaferîn
By:
Khana Qubadi (1704-1778)
6 minutes
468 views
* hem dîsan ce new xanay qubadî
neqaş xoş nûs řay te’rîfatî
herkesê nedewr dinyay sitemkar
be pakîy kirdar kerdenş řeftar
sułtan îbrahîm çun pak kirdaren
kuşendey maran hezar hezaren
bişîn beser wext şêrbeçey xûnxiwar
řû kerd nedergay pak kirdigar
wat yařeb aman gunakaranim
xecałet nekar şermesaranim
be nûr xurşîd mah tabanit
be aferîdey çetir û seywanit
byawe bedad padşay şahan
řuzî dehendey cem’ gumřahan
êd wat û sucde berd řûmała ne xak
esrîn nedîdeş merêza bê bak
řêza nedîdeş esrîn hûnîn
axir bê hoş kefit ne řûy serzemîn
ser ta pa ce hûn esrîn bibî teř
ama ne xwabiş ’abid xoş feř
watiş şazade şêr beçey xûnxiwar
tofîq medo pêt padşay cebar
lewḧ bigîr bedest řûbeřûy maran
defi’ mebo temam maran hezaran
sake êd şineft bewr sîne çak
horêza neřûy ew xak nimnak
lewḧ girtiş bedest řûbeřûy maran
yekser ferar bîn şûm bedkaran
hem dîsan cenew sa’îqe û ẍubar
dinya temam bî we zułmat tar
ew řo ta êwar gerd û ẍubar bî
ta axir ẍubar fena û ferar bî
dîş ke mekanê gunbed mêsałê
têda nîştebê yek pîre załê
şazade ce new nîga, kerd be lewḧ
heta me’lûm bo ḧerf û qisey lewḧ
dîş ke nwîsyan ferzend ’adił
endêşet nebo memanî xecił
tîrê ce keman xedeng piřtaw
ḧazir ker pey wêt bebir serḧesaw
bişane ce puşt mel’ûn napak
her weqit be tîrit dêw mebo hilak
er xeta kero tîrit cew napak
me’lûm bo celat to mebî we xak
bełê ernedey bew dêw dûreng
ta be ziranîy wêt mewî we seng
tîr duwemî benamî cebar
bişane ce post mel’ûn bedkar
ernedey bedêw ey şêr řûy ceng
ta be ḧewz naf to mebî we seng
tîr swemîn bezat dawer
ernedey ce dêw mel’ûn kafer
bezat bî çun ey bewr neberd
temam endamit saf mebo be berd
şazade lewḧiş nebeẍeł ca kerd
des berd pey terkiş nam xuda berd
şazade tîrş da ne řûy keman
watiş ya ẍefûr padşay subḧan
tîrş hewa da ce dêw xeta kerd
ta bezranî newca bî we berd
tîrduwemî xeta kerd ne ceng
ta be ḧewz naf temam bî we seng
sake şazade dił awerd be coş
watiş ya kerîm setar siř poş
ya kanî kerem padşay şahan
ya delîl xeyr gum kerde řahan
umêdim be ton padşay serwer
necagey ẍerîb nawerûm zerer
ya kes bê kes bê kesan kes
sîway zat to nîyen dadřes
bederîm necat ney kaxe çołe
ney telîsim sext mułk zengołe
yarim giriftar telîsim dêwen
dêw bedkirdar merdim firîwen
ba bom neşar çîn dîdeş neřamen
întîzar dîdar her we temamen
benerme nermê wêş melawnawe
seng telîsmat metawnawe
bezar û zewîr řû mała ne xak
axir bê hoş bî, new xak muẍak
* hem dîsan ce new ’abîd piř hoş
ama ne xawiş ew bewr biř coş
watiş ey ferzend padşay çînî
nîga ker be lewḧ ewsa mewînî
sê def’e têda îsim şay merdan
bwer ce řûy tîr řeha bikeran
înşeła be ’ewn danay lamekan
medey ce ew dêw mekerî bê gyan
dest berd pey beẍeł lewḧ awerd we ber
nîgay lewḧiş kerd ew şêr piř zor
sê def’e nûsa îsim şay merdan
best kerdiş wetîr da ce řûy keman
* be heybet kêşa kemanş be coş
ne mewc (cace) ber’ama xiroş
řeha kerd xedeng berendey neberd
da ne puşt dêw necergiş wiyerd
derdem helak bî kefit ne xak serd
řoḧiş bemalîk cehenem siperd
şazade çun dî şukirane bikerd
şukir xwawend hem be ca awerd
cewdem farêẍ bî řû ne gunbed kerd
şî ne dilê kax çun merdan merd
genc û cewahîr bê ḧed dî we çem
ce hezar hezar ce hîç nebî kem
hîç nîga nekerd be genc û gewher
cûya bî perê nazar dułber
dîş ke ye çahê tarîk û dişwar
bew tewr tarîken çun telîsim nar
zencîr newca kiryan awêzan
dest girt be zencîr bêzar bî ce gyan
daxił bî we ça şêr diławer
dîş nîşten ẍembar sewł nazperwer
zencîr negerden çem keyl esrîn
sernyan we ban zanû be temkîn
be soz derûn mesoza û mewat
caget xałîyen řoḧim bo fedat
mer nimezanî yarit esîren
gerdenş ce bend tewq û zencîren
min daym pey to zar û ẍemînim
le zîndan dêw matem nişînim
ey mîwey dirext zîndeganîy min
ey ab ḧeyat cawîdanîy min
pey çî bey destûr karit direngen
yarit peşêwḧał çun syasengen
ey fełek pey çêş karit bey tewren
sermayey ’eyşit her cefaw cewren
* min çêşim kerden her řo be barê
medey cefay min her řo becarê
şazade şineft ey řaz dułber
dûd henaseş da neferq ser
watiş ḧazirim gyan şîrînim
minîş sergerdan noş aferînim
ce şewq dîdar her dû bîn bê hoş
bezarî herdû girtin be aẍoş
ta ama wehoş şazadey çînî
dîş noş aferîn bew nazenînî
yek ḧorî ne cay tarîk dyaren
maçî şikofey eweł weharen
ser ta paş temam be tewq û zencîr
nîşten ne’ewca bewêney esîr
dîş negoşey çema řêzno esrîn
ser ta pa ne tewq bende zencîrîn
wat noş aferîn ew şîrîn xałe
pey çî we zencîr hem peşêw ḧałe
kinaçey xwace ’ebdureḧmanen
salar serwer gişt perîyanen
meymûne xatûn şox şîrîne
’elqem awerden bey serzemîne
temam gird řazan sewł nazperwer
yek yek ḧałî kerd şêr diławer
şazade ey řaz şineftiş be goş
herdû nazenîn girt we bałay doş
new cagey dişwar ber’awerdişan
ce ẍem û ẍuse řeha kerdişan
meymûne xatûn şîrîn nazar
wat ey şazade keyanî kirdar
to min necat day ney cagey çołe
ce ey telîsim mułk zengołe
* dû sałen temam derûn piř ji anim
întizar dîdar yaney bawanim
* bewe’dey sê řoj biderî řuxset
baz çenî babom meyom wexzimet
şazade watiş ey nûr ’eynim
nûr bînayî û řewşenîy zeynim
beher ko meşî xwa yarit bo
nenîşî ẍafił fikir dimat bo
sa ke êd şineft xatûn bêgerd
ce noş aferîn hîmet xwahî kerd
perwaz kerd lwa şî be yaney wêş
şad bî bedîdar eqreba û xwêş