zelẍem noş aferîn deba bo telîsmî zengułe lelay arayşî dêw
From the Book:
Suɫtan Îbrahîm û Noşaferîn
By:
Khana Qubadi (1704-1778)
5 minutes
749 views
şazade û yaran ba berkenar bo
bimano ta weqit ce xwab bêdar bo
* (xana to er fam werînit menden
řiştey ẍem û daẍ şewqit nemenden)
goş der bedastan zemaney keçbaz
hengamey ’ezîm çi tewr mebo saz
zana bekirdar dêw bed’endêş
şazade meşo be mekan wêş
ferda şîrîn xał bexatir guşad
meberot welay ew ademîzad
ferda cedaẍiş matem binîşîm
ne ẍuse û ne ẍem cefa bikêşîm
daxił bo be çîn şay noş aferîn
ẍem nederûnim cem mebo çîn çîn
êd xasen îmşew meydanim çołe
biberûm bemułk kax zengołe
welay arayş walîdey diłsoz
bisparûm be dest mader şeb doz
êd wat we’aram dêw syareng
ce hîç kes nama esłen seday deng
befirset zana mel’ûn bedkar
dest kêşa be bał sewł sayedar
pêça we toy řext we leḧaf wêş
şana bedoşda dêwî bed’endêş
řahî bî berah ew sya ẍûle
berdiş betelîsim mułk zenkûłe
şî welay mader sucdey zemîn berd
şîrîn dułber bemader siperd
mader wat ferzend ey şîrîn xałe
cekot awerdin ey daney lałe
dêw ḧał û eḧwał guzeştey werter
seranser řazan be ewda xeber
kuştenî delẍem zelîlîy ’elqem
watiş be mader ew dêw dujem
cadû çun şineft xiroşa ce derd
pey ferzendanş xeylê zarî kerd
ce dimay zarî cadûy nasewab
qesem werd duxter mekerûm kebab
e’zaş mepaçûm cetenxiway ferzend
neřûy dunyada mekerûm wepend
serta pay bałaş ateş waran kem
wepend û watey řozgaran kem
ademîzadan peyda kem nedewr
têẍ cefaşan mekêşûm be cewr
zelẍem çun şineft guftar mader
ahîr cergiş coşya neser
watiş ey mader buyer cey kare
wes bider nedił ey tîr û xare
er noş aferîn zerer bikêşo
min melekulmewt gyanim mekêşo
wacben min wêm pare pare kem
řoḧ wêm bedest wêm aware kem
’aşiq dîdar noş aferînim
we bê ew nîyen gyan şîrînim
axir sewgend werd dêw řûsyah
wat noş aferîn mewzûm ne çah
der dem zencîrê awerdin welaş
nya negerden çenî dest û paş
şay noş aferîn bewêney mahî
wistişan netoy çah syahî
şay noş aferîn ce hîcran wêş
megrewa zar zar pey bê kesîy wêş
be soz derûn wêş melawnawe
seng û keş û ko metawnawe
bedîdey piř nim kerdiş nigayê
ama bedîdar ḧorî leqayê
ḧorî çi ḧorî řiştey leqay zat
nîyen napeydan ce řûy serbîsat
zencîr ahen benden negerden
sertapaş be tewq zencîr benden
şew tarîk tar goşey wermuẍar
menało bezar nałey bê qerar
mewatiş yareb be ḧacetmendan
bikyane perêm mergê we asan
ya min cey muẍar tarîk û bê der
xelas bikerebe şiq pêẍember
serasîme bî şay noş aferîn
kêyen megrewo be nałey ẍemgîn
selam kerd şîrîn bew şîrîn kelam
perî wat şîrîn ’eleyke selam
nîşt welaşewe sewł sosen xał
persa eḧwałat çigûnegîy ḧał
wat noş aferîn nimezanî kêm
bwaçûm perêt nam nîşan wêm
min ademî nîm ce perîyanim
kinaçey xwace ’ebduřeḧmanim
çun ceyran şox welendî sawam
hefit taq hefit buruc îremen mawam
daym nîştebîm ne burc şahî
ce pay textim bî saz řubahî
çend kenîz şox zułfan ’enberîn
meḧbûb meḧbûban newxałan şîrîn
řojê heway seyr seram kefit neser
çenî sed kenîz zułfan bo ’enber
seyr seḧram kerd dyar be dyar
ta şîm beserḧed nezdîk bulẍar
ce naga ’elqem dêw napesend
peyda bî newca çun koy demawend
dest awerd bahom girtebê beqest
be sêḧir û efsûn herdû destim best
awerdim bey ca mel’ûn bî dîn
ama nîşt welam, be qisey şîrîn
herwêş muxtar bî perwaş hîç nebê
be naḧeq temay wesił minş bê
min řazî newîm nekerdim qebûł
dêw ce daẍ min ce ẍem bî melûl
mel’ûn bey destûr zencîr bendim kerd
ce qehir û ẍezeb sya qîrş werd
be ḧerf mader awerdim wey ca
watiş ney ca bo ta mebo řeza
ta řazî nebo nîyen necatiş
mebo ney ca bo ta bo ḧeyatiş
cewla kenîzan zułfan bo ’enber
xeber min berdin ewan pey pêder
baboy min ce qîn syabî nedaẍ
ferma ’elemdar bikêşan beydaẍ
çend hezar swar ne cin û perî
çend tîp çend ’elem kerd cem awerî
ama we ey ca perê ceng kîn
xirab kero kax ey cadûy le’în
ey dêw mel’ûn bedxoy bedsirêşt
leşker baboy min temam da şikist
îste sê sałen destax dêwim
betewq û zencîr xatir peşêwim
ceyaney babom nedarûm xeber
xuda mezano çêş aman we ser
noş aferîn wat gyan şîrînim
xatirit cem bo ey nazenînim
sułtan îbrahîm mebo xeberdar
perêman nepişt řux mebo swar
mawero wey ca xeyme wenîm sat
îme herdûman medero necat
necadû ne bewr ne dêw piř fend
neşêr û neẍûl nemarî gezend
hîç kam xelasî nîyen nedestiş
nedaron tabişt keman û şestiş
nazaran şox řendan cem cam
herdû bew ḧerfe girtişan aram
şoxan teřlan herdû be demsaz
newca bimano her bikeran řaz