geyştinî hewałî kujranî wezîr û efrasyaw be cîhangîr şa
From the Book:
Suɫtan Îbrahîm û Noşaferîn
By:
Khana Qubadi (1704-1778)
4 minutes
525 views
ce tenxiway kelam danayan kar
bey tewr dastan watin betîkirar
seřafan dewr ḧekakan kar
ey dastan watin perê řozgar
xasey ẍułaman ḧeremseray şa
ce me’rekey şew şa kerdin aga
ce wezîr kuştin ce efrasyab
ce gişt babetê kerdin serḧesab
şa ke êd zana sya bî ce qar
tełeb kerd wezîr namîy namdar
watiş ey wezîr cay ’eqił û hoşim
îne çi basen yawa be goşim
ey ceng û ẍewẍa çêşen cey şare
pey min qebîḧen xeylê ey kare
wezîran xas ’alîcahanen
hemîşe kilîd ’eqił şahanen
bwaçe tedbîr ey kare çêşen
min cey kirdare xatirim řêşen
karê bisaze dił sakin bo pêş
farẍ bo ce bîm pejarey teşwîş
wezîr wat ey şay fereydûn nejad
canşîn ca text keyqubad
tedbîr ey kar zahêr dyaren
ye mexfî nîyen ye aşkaren
ey gişt şazadan êqlîmat beř
nîşten xak nişîn nepay text zeř
matem û peşêw û zaru ẍemgînen
eragêł xał noş aferînen
me’lûmen her şew nesewday diłdar
be şimşîr yektir mekeran (qehar)
horêze bişo to belay ’abêd
’abêd piřhoş danay hunermend
şay şîrîn cemîn berg qeseb poş
bişo beser ab beserçeşmey noş
şistuşû keran şêwey cemałş
bidero řewneq fîrûzey xałş
herta nyazit mebo mubarek
bikero encam tehye û tedarek
bîberot pey wêş be şadmanî
to mebî farêẍ be kameranî
pesend kerd tedbîr şay dara nigîn
watiş bewezîr hezar aferîn
casûsan zanan xeber berdişan
şazadan ney kar ḧałî kerdişan
şazadan yek yek xatir perêşan
girtin tedarek karsazîy wêşan
heryek tuḧfeyî sengîn behayê
layeq beserkar gişt padşayê
şîn be xak pay ’abêd piř huş
bewêney sa’îl řûmałan nerûş
metłeb wêşan îzhar kerdin pêş
ẍerez her kesê be temenay wêş
feyaz ’abêd ama be guftar
wat ey şazadan keyanî kirdar
’ebes mederin tesdî’ wêtan
ey kare sûdê nedaro pêtan
çend sał nedaro şewher kerdenş
fa’îdeş nîyen cefa berdenş
gişt xatircem ban bizanan bekar
nimedo pêtan şîrîn nazdar
tamudey çend sał nedaro şewher
ha ne me’rekey de’way şořuşer
çend wiłat û şar mekero xerab
çend telîsim sext cadûy nasewab
çend bełay ’ezîm hem meyo neřaş
ne çend cageda mederûn sizaş
nazdar bêgerd şox cem mezaq
meşo ta wiłat cezîrey waq waq
nazdar bêgerd şox sya çem
meşo ta be baẍ gułbaẍçey îrem
nazdar bawan şox şeyday şeng
ser medo neşar naḧyey fereng
şay noş aferîn nazdar bawan
meşo we muḧît qesir suleyman
çendê menîşo newqesre çołe
sermedo ne kax mułk zengołe
cedmay çendê دەعûاێی ’ezîm
mebo we nesîb sułtan îbrahîm
ew mekero fetiḧ telîsmat sext
meşo bew cage bewext û bê wext
ferzend ’ezîz ’adił şay çînen
îse cey şare matem nişînen
berkerin nedił xeyałan xam
nesîbtan nîyen şox cemîn cam
şazadan îzhar şineftin begoş
ser wistin bewar neřaz bîn xamoş
ce tekyey ’abêd negirtin qerar
lwan bemenził wêşan beẍembar
xeber pêş yawa şazadey çînî
yawna bederd mat û ẍemgînî
sub seḧer xurşîd padşay setar
serzemîn poşa beleqay enwar