xesrewm newen
From the Book:
Dîwanî Mestûre
By:
Mastoureh Ardalan (1804-1848)
4 minutes
1420 views
xesrewm newen ...
kor bam ce dîde ye sałî newen
temam mensûban, er řo, er şewen
mat û sergerdan bê xurd û xewen
ne dûrîy xesrew medan we serda
yexe ta daman wisten be werda
maçan: mer xesrew sermestî xawî?
mer bêzar ne seyr şikar û řawî?
ye wext û wadey seyr û şikaren
seḧra poşîde sebzey weharen
xyaban sebzen çun zumeřed řeng
bułbuł meşẍûłen be nałey aheng
gułsurx nemenden řeng ne cemînş
şeqayq řewan eşk û esrînş
nergis ḧesretmend ne dîdarî ton
daẍdarî bałat, er şewen, er řon
şewbo ne kohsar [her dad pelaş]
benefşe û ře’na newḧe û ’ezaş
zêba û nesteren çenî sîsenber
elwedaşanen pey şay lał kemer
sosen û lale eger be daxen
gułezerd perêt ne ax û daxen
guł zemeq poşa lîbasî matem
ew daẍdarî ton şay dara ḧeşem
her yek we řengê dax we banî dax
ne daxî bałat sertapa qełax
newḧexwanî ton ne baẍî xesrew
cem besten ne dewr utaẍî xesrew
xusûsen «sułtan» meḧzûnî muzter
menałûn perêt ce zeyneb beter
mewaçûn: feryad fuẍanim xesrew
řenc berdey bê sûd we badim xesrew
’ezîzî nazar bawanim xesrew
bînayî be řast çawanim xesrew
nehałî taze pey yawam xesrew
ateşparey ceng hem dawam xesrew
mûnîs çenî derd hem ẍemim xesrew
melûlî zencîr sitemim xesrew
we destî azar ’elîlim xesrew
ne damanî xak zelîlim xesrew
new qebrî tarîk destaxim xesrew
saḧêb supa û san beydaxim xesrew
biray menoçîhir sîfatim xesrew
koç kerd we řagey nehatim xesrew
cwanî bîst û no sałem xesrew
diłxuşî matem ne ’ałem xesrew
bebê to wêłim ne herdan xesrew
qesem be î’caz şay merdan xesrew
ta ew řo seḧray meḧşer mexêzo
şerit bo esrînim be giłkot řêzo
lał bam ce zuwan, kor bam ce dîde
ne dûrîy bałat, şay pesendîde
herçend megrewu be zarî û xuroş
carê ter dengit bijnewun be goş
hîç dengê nîyen pey saknîy dił
wêł û sergerdan xergaw û xicił
menałû zar zar be dîdey ẍembar
esrînim řewan çun seylî wehar
ye zayełey şîn řoy řestaxêzim
megrewu zar zar pey şay perwêzim
mewaçûn: xesrew qezat be gyanim
mełhemî derûn řêşî buryanim
bew xuda qesem waḧîd û ferden
ne to zyadter kesim nemerden
şew û řo ne hîcir daẍî bałay to
her mewaçûn: dad, her mekerûn řo
mewaçûn: hey dad, şay xesrom řo
cêgey gişt kesim ne cay babom řo
meḧremî řazan cey werterm řo
diłdarî ’ezîz hem diłberim řo
ne yagey babom cêgey xwêşim řo
îse ser defter řojî řeşim řo
saḧêb wefa û şerit cay hawarim řo
enîs û mûnîs ẍemgusarim řo
şewketî cemî’ erdełanim řo
xamoşîy çiray no bawanim řo
nehałî dewłet lafaw berdem řo
ce nexlî şadî ber newerdem řo
emîrî e’zem kurdistanim řo
mayey diłxoşîy dostanim řo
serdarî saḧêb mułk û małim řo
mecnûnî çołgerd peşêw ḧałim řo
xesrew, xom fîday nakamîy kamit
fîday cwanîy nîme temamit
çon mebo -aẍem- ne řay dehrî dûn
min saẍ û selîm to be seringûn?
umêdim be ḧeq danay zulcelal
minîç her bew şerit şêxan kem be mał
ta ce řûy xesrew nebûn şermesar
bişûn we xidmet şayî cem wîqar
îse ta zîndem qelbim çun kewaw
ce dûrîy xesrew mesozo be taw
«’îzet» do’a ker wes bider gezaf
meşî bew mekan be yeqînî saf