xesrewm derdim
From the Book:
Dîwanî Mestûre
By:
Mastoureh Ardalan (1804-1848)
3 minutes
1514 views
xesrewm derdim ...
ce cewrî fełek nasoren derdim
ciger piř ce hûn, henase serdim
esrîn serwazen we çîhrey zerdim
xusûs -fîdat bam- şay kemer lałim
îmşew ce soziş ciger zûxałim
perê nakamît megrewam be taw
ce bedbextîy wêm ser nyam we xaw
dîm ce xaw merg: şay cem wîqarim
mesrûrî derûn řêşî zamdarim
ce kîtabxane çun herdecaran
ne dewrit diłşad cem besten yaran
xesrew wêt we feř xesrewanewe
nîştebêt ne sedir kîtabxanewe
çenîy bedbextan ’eyş û noşt bê
lał bam, nam merg feramoşt bê
her yek we new’ê mekerdî diłşad
new qebrî tarîk nimekerdî yad
mewatî ewweł newciwanîyen
îbtiday sirûr kameranîyen
goşt we awaz nałey aheng bê
xatirit mesrûr ce seday çeng bê
meclîsî mexmûr sermestî mey bîn
mutrîban sergerm ahengî ney bîn
be şad mesawan ser we xakî pat
řoḧ û ’umir û gyan mekerdin fîdat
to bew tewr û terz herde caranit
diłdarî meday yek yek yaranit
mewatî: sułtan, nûrî dîdey min
xwaherî meḧzûn ẍemkeşîdey min
çonî cey gerdiş çerxî ne řewaq
çenî mewyarî eyyamî fîraq?
ye çendê wexten bê wefa û sîfet
perê pabosim namay we xełwet?
sewgendim be zat ḧeyî bê çûnen
meylim çenî to cey wer efzûnen
şewan be yadit be řoj awerden
pey tasey ře’nam îmanim herden
çenî î bedbext bikerdî xîtab
beḧist bê neqił teḧrîr û kîtab
ce şûmîy î bext neḧsî syaçar
xesrewm, new xaw nagah bîm bêdar
dîm ne esasey xełwet, ne şahen
tenyayî meḧzûn derûn syahen
tulû’î subḧen hewa lûlûřêz
ama be yadim ne bezmî perwêz
we nerim nermê dest kerdim we şîn
lawnawim xesrew be dîdey nimîn
watim: xesrewm, fîday fewtit bam
qurbanî mestîy badey mewtit bam
fîday ew nałey soz cergit bam
qurbanî sefer mułkî mergit bam
fîday ax û dax wextî fermanit
qurban lway řagey nîhanit
fîday saz û soz meclîsî bezimit
fîday tepił û kos meydanî řezimit
fîday ew meclîs xesrewî tewrit
îse be qurban destaxîy qewrit
xesrew, min sergerd qesrî xapûrit
fîday ew yaney tar û deycûrit
fîday dû ebroy syay mişkînit
qurbanî kakoł ’enber agînit
ser gerd dû ’eynî şehlay meygûnit
fîday mensûban dił piř ce hûnit
aẍem, ser hordar bwîne ḧałim
be nakamîy to, derûn zûxałim
qesem bew cemał yûsif asay to
mûnîsim ahen daym şew û řo
sa fełek çun min syaçare bo
seringûnî xwar, pare pare bo
nerdî mergiş şend pey şay feřux feř
kameranîy wêş nekero ta ser
baqî ce ne’îm daym şadît bo
mestûrePen name qurban namuradît bo