seḧer hestam le xew bîstim ke îmřo řojî newroze
bo newrozî sałî 1960 witrawe
From the Book:
Dîwanî ’Arif ’Urfî
By:
Arif Urfi (1896-1961)
2 minutes
679 views
seḧer hestam le xew bîstim ke îmřo řojî newroze
şî’arî kurde lay yektir biřon bo cejnepîroze
biray şîrînî kurd îmřo ke wa řojêkî diłřûne
ke řojî řezmî kawe bezmî sertextî fereydûne
hewayî ceyşî newroze şikanî leşkirî zistan
berewdûy na becarê befrî ser kêwan heta keywan
ke xałxał kewte ser befrî serî ew kêw û kosare
ełêy xałî serî gonay kenîşke kurdî nazdare
le hařehařî lafaw û le girmey kûre şêwane
sema kewte sema îmřo becarê dem be giryane
behare řojî newroze biłê řojî jyan û jîn
gułî ẍunçey legeł bulbul bibestin ba girêy kabîn
nemamanî nejadî kurd mewestin des lenaw des ken
le baẍî sîneda narinc û lîmoy gułbedem derxen
le neqşî ẍunçeyî gonay kiçanî qednemamanî
hezaranî wekû manî ekewne dest û damanî
le cwanîda behay řûy ew kiçe kurde kemerçîne
şiksitî nirxî bazařî cemałî diłberî çîne
şika bazařî şermî guł ḧeyay çû nêrgisî şehla
gułî baẍî îrem emca le daxana henisk hełda
gułałey sûrî ser gonayî em core cewanane
le serçawey diłim eřjête xwar xwênî cigermane
nemamanî berey baxî nejadî kurde serçope
desa saqî qedeḧ piř ke, bese tobe ledes tobe
be xwênawî ciger bû ẍunçeyî gułzarî kurd geş bû
le xoşyana were bimbîne wa řîşî sipîm řeş bû
’êraqî xoşewîstî min behoy em řoje pîroze
umêdman waye serḧedman bigate xakî fermoze
hemû sałê be xoşî řû bida cejnî newey kurdan
minî pîrîş le goşey ḧesreta ẍembar û sergerdan
nemamî baẍî newciwanîm beser çû ẍunçe bêber ma
wekû ferhad be naçarî qułingê dem beser serma
leser newroz û cwananî weten eş’arit bem terze
«mela» derkewt ke bîrî nîştîmanit dyare zor berze