îneha ne wext cwanîm byen
pîrî
From the Book:
Dîwanî Mela Ḧesenî Dizɫî
By:
Mulla Hasen Dizli (1859-1946)
2 minutes
679 views
îneha ne wext cwanîm byen
fesłî sermestî û nadanîm byen
min ce kirdey wêm peşîmanîm berd
we’dey pîrîmen cwanîm wiyerd
cwanîm wiyerd pîrîm nimanan
sikey sifîdîm kul ’ałem wanan
îste min pîrim pîrî zer’abim
qamet qebaxim, şerîk axim
daxî giranim dinyam wiyerden
pey axretîç, karêm nekerden
dinya be wêney sazî serkeşa
penc û dû řoyê, pey kesê weşa
çirayê çun nûr, pey wêş medrewşo
ta weřûy dinya, meḧşer mexruşo
cîzey semawer, nîgey diłey teng
şořey fewarey firmêskan sed řeng
metersû bimrû, qebrekem bo ẍar
îzra’îlNamed-Entity ce des nałem bo bêzar
metersû bimrû, byaban bo cêm
hamseran beyan, nezanan min kêm
aro lwanî konehewaran
dad giranim, koçşa kerd yaran
ne yaran menen, ne dewarşan
dîm ke çen sengê, ce hewarşan
persam ey senge syay řû herde:
ko kone yaran toşan cem kirde?
watiş: a yaran to persî eḧwał
adê barşa kerd, lwey syamał
aro lwanê yagekêw to bê
be bonew towe, xakiş weş bo bê